హైదరాబాద్, నిలువుటద్దం ప్రతినిధి

తెలంగాణ ప్రభుత్వం ప్రతిష్టాత్మకంగా అమలు చేస్తున్న ముఖ్యమంత్రి సహాయ నిధి (CMRF) ద్వారా పేద ప్రజలకు మెరుగైన వైద్యం అందుతోందని శేరిలింగంపల్లి నియోజకవర్గ కాంగ్రెస్ పార్టీ ఇన్‌ఛార్జ్ వి. జగదీశ్వర్ గౌడ్ తెలిపారు. నియోజకవర్గ పరిధిలో అనారోగ్యంతో బాధపడుతూ చికిత్స పొందిన 25 మంది బాధితులకు మంజూరైన రూ. 14,95,000 విలువైన ఆర్థిక సహాయ చెక్కులను స్థానిక నాయకులతో కలిసి ఆయన పంపిణీ చేశారు.

ఈ సందర్భంగా వి. జగదీశ్వర్ గౌడ్ మాట్లాడుతూ, ముఖ్యమంత్రి ఎ. రేవంత్ రెడ్డి నాయకత్వంలోని ప్రభుత్వం సంక్షేమమే లక్ష్యంగా ముందుకు సాగుతోందని పేర్కొన్నారు. ఆపదలో ఉన్న పేదలకు సీఎం సహాయ నిధి భరోసా కల్పిస్తోందని, అర్హులైన ప్రతి ఒక్కరూ ఈ పథకాన్ని సద్వినియోగం చేసుకోవాలని సూచించారు. కుటుంబ పెద్ద అనారోగ్యానికి గురైనప్పుడు తలెత్తే ఆర్థిక ఇబ్బందుల నుండి ఈ నిధి కుటుంబాలను అప్పుల ఊబిలో కూరుకుపోకుండా కాపాడుతోందని ఆయన అభిప్రాయపడ్డారు.

సకాలంలో ఆర్థిక సహాయం అందించిన ముఖ్యమంత్రి రేవంత్ రెడ్డికి, వైద్య ఆరోగ్య శాఖ మంత్రి దుద్దిళ్ల శ్రీధర్ బాబుకు లబ్ధిదారులు ఈ సందర్భంగా కృతజ్ఞతలు తెలిపారు.

ఈ కార్యక్రమంలో రాష్ట్ర లేబర్ సెల్ ఉపాధ్యక్షులు నల్ల సంజీవ రెడ్డి, బల్లింగ్ యాదగిరి గౌడ్, పలువురు డివిజన్ అధ్యక్షులు, కాంగ్రెస్ పార్టీ నాయకులు మరియు మహిళా కమిటీ ప్రతినిధులు పాల్గొన్నారు.